БАЙГАЛЬ ОРЧНЫГ БОХИРДУУЛСАН ХУУЛИЙН ЭТГЭЭДЭД ЭРҮҮГИЙН ХАРИУЦЛАГА ХҮЛЭЭЛГЭВ

2023-01-17    |   988

---

БАЙГАЛЬ ОРЧНЫГ БОХИРДУУЛСАН ХУУЛИЙН ЭТГЭЭДЭД

ЭРҮҮГИЙН ХАРИУЦЛАГА ХҮЛЭЭЛГЭВ

 

Дорнод аймаг дахь Сум дундын эрүүгийн хэргийн анхан шатны шүүхийн 2022.12.19-ний өдрийн №383 шийдвэр

Шүүхийн шийдвэрийн тойм №1, 2023.01.17

Шийдвэрийн төлөв: Хүчин төгөлдөр болоогүй.

Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно. “

 

Монгол Улсын нутаг дэвсгэрт байрлах тусгай зөвшөөрөлтэй талбайд үйл ажиллагаа явуулж байгаа БНХАУлсын хөрөнгө оруулалттай “АА” ХХК-ийн холимог металлын ордын баяжуулах үйлдвэрийн хаягдлын сан буюу далангаас химийн хорт бодисоор бохирлогдсон ус шүүрч хаягдсаны улмаас газрын хэвлий, усны сан бүхий газар, гол мөрний урсац бүрэлдэх эх газарт тархаж хүний эрүүл мэнд, мал, амьтан, ургамал, тэдгээрийн үр удамд сөрөг нөлөөлөл үзүүлэх, өвчин эмгэг үүсгэх, үхэл, мөхөлд хүргэх нөхцөлийг бүрдүүлж хуулийн этгээдийн ашиг сонирхлын төлөө байгаль орчныг бохирдуулж байгаль орчинд их хэмжээний хохирол учруулсан байна.

           

Эрүүгийн хуульд зааснаар хуулийн этгээдийн ашиг сонирхлын төлөө байгаль орчныг бохирдуулсан бол эрүүгийн гэмт хэрэгт тооцохоор заасан. Нийслэлийн прокурорын газрын Хэрэг бүртгэх, мөрдөн байцаах ажиллагаанд хяналт тавих 2 дугаар хэлтсийн хяналтын прокуророос “АА” ХХК-нийг уг гэмт хэрэгт холбогдуулан яллах дүгнэлт үйлдэж гэм буруутай эсэхийг шийдвэрлүүлэхээр хэргийг шүүхэд ирүүлжээ.

 

Шүүхээс шүүгдэгч “АА” ХХК-ийг хуулийн этгээдийн ашиг сонирхлын төлөө байгаль орчныг бохирдуулсан гэм буруутай гэж дүгнэв.

 

Энэ гэмт хэргийг үйлдсэн хуулийн этгээдийг тодорхой төрлийн үйл ажиллагаа явуулах эрх хасаж, 40,000 - 200,000,000 төгрөгөөр торгох ял шийтгэхээр хуульд  заасан бөгөөд шүүхээс тухайн хуулийн этгээдийн уул уурхайн олборлолтын болон баяжуулалтын үйл ажиллагаа явуулах эрхийг 2  жилийн хугацаагаар хасаж, 150,000  нэгжтэй тэнцэх хэмжээний буюу 150,000,000 төгрөгөөр торгох ял оногдуулж шийдвэрлэв.

 

Шүүхийн шийдвэрийг бүтнээр харах цахим холбоос:

https://shuukh.mn/

 

Тоймыг бэлтгэсэн: Дорнод аймаг дахь Сум дундын эрүүгийн хэргийн анхан шатны шүүхийн шүүгч Г.Намуунтуяа