ӨСВӨР НАСНЫ ШҮҮГДЭГЧИД ХОЛБОГДОХ ХЭРГИЙГ ХЭРЭГСЭХГҮЙ БОЛГОЖ ШИЙДВЭРЛЭВ

2023-03-09    |   761

---

Дорнод аймаг дахь Сум дундын эрүүгийн хэргийн анхан шатны шүүхийн 2022.08.08-ны өдрийн №246 шийдвэр

Шүүхийн шийдвэрийн тойм №3, 2023.03.07

Шийдвэрийн төлөв: Хүчин төгөлдөр болсон.

Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно. “

 

Өсвөр насны шүүгдэгч Х-г 15 нас 5 сар 22 хоногтой байхдаа буюу 2022 оны 03 дугаар сарын 16-ны өдөр  хохирогч Г-г сантехникийн багажаар олон удаа цохиж алахыг завдсан гэх гэмт хэрэгт холбогдуулан аймгийн прокурорын газраас яллах дүгнэлт үйлдэн хэргийг шүүхэд шилжүүлжээ.

 

Анхан шатны шүүх хэргийг хянан хэлэлцээд хэрэгт цугларсан нотлох баримтыг үндэслэн прокуророос өсвөр насны шүүгдэгч Х-г хүнийг алахыг завдсан гэмт хэрэгт холбогдуулан яллах дүгнэлт үйлдэн ирүүлснийг, өсвөр насны шүүгдэгчийн сэтгэл зүй, аливаа асуудлыг харах, шийдвэрлэх, сэтгэн бодох чадвар зэрэг нь насанд хүрсэн этгээдээс өөр байдаг онцлогтой байдлыг харгалзан түүнд холбогдох хэргийг “хүний эрүүл мэндэд хүндэвтэр хохирол санаатай учруулсан” гэж өөрчлөн, гэм буруутайд тооцож, өсвөр насны шүүгдэгч нь “Эрүүгийн хуульд заасан ял оногдуулах насанд хүрээгүй” гэсэн үндэслэлээр хэргийг хэрэгсэхгүй болгож шийдвэрлэсэн.

 

            Давж заалдах шатны шүүх анхан шатны шүүхийн шийдвэр нь хэргийн бодит байдалтай нийцэхгүй байна гэсэн дүгнэлт хийжээ.

 

            Улсын дээд шүүх өсвөр насны шүүгдэгч Х-д холбогдох хэргийг хянан хэлэлцээд өсвөр насны шүүгдэгч Х-ийн хувьд хохирогч Г-г санаатай алах сэдэлт, зорилго хэрэгт авагдсан нотлох баримтуудаар хангалттай тогтоогдоогүй, тэрээр өөрийн үйлдлийн аюултай шинжийг бүрэн ухамсарлаагүй, гэнэт үүссэн өдүүлбэрээр хохирогчид гэмтэл учруулсан байх тул анхан шатны шүүхээс хэрэгсэхгүй болгож шийдвэрлэсэн нь Эрүүгийн хуулийг зөв тайлбарлан хэрэглэсэн, шийтгэх тогтоол нь хууль ёсны ба үндэслэл бүхий байх шаардлагыг хангасан байна гэж дүгнэж хохирогчийн гаргасан гомдлыг хэрэгсэхгүй болгосон байна.

 

 

Шүүхийн шийдвэрийг бүтнээр харах цахим холбоос:

https://shuukh.mn/single case/66802?daterange=2022-01-01%20%-202022-10...

 

Тоймыг бэлтгэсэн: Дорнод аймаг дахь Сум дундын эрүүгийн хэргийн анхан шатны шүүхийн шүүгч Г.Намуунтуяа