“НЭЭЛТТЭЙ ШҮҮХ ХУРАЛДААНЫ БИЧЛЭГИЙГ ШҮҮХИЙН ЦАХИМ ХУУДАСТ БАЙРШУУЛАХ ЖУРАМ” ХЭРЭГЖИЖ ЭХЭЛЛЭЭ
2025-01-20 | 191Шүүхийн ерөнхий зөвлөлийн 2024 оны 12 дугаар сарын 05-ны өдрийн 276 дугаар тогтоолоор баталсан “НЭЭЛТТЭЙ ШҮҮХ ХУРАЛДААНЫ БИЧЛЭГИЙГ ШҮҮХИЙН ЦАХИМ ХУУДАСТ БАЙРШУУЛАХ ЖУРАМ”-ын дагуу шүүх хуралдааны бичлэгийг шийдвэр албажиж гарснаас хойш ажлын 5 өдрийн дотор шүүхийн цахим хуудаст 3 хоногийн хугацаатай байршуулах бөгөөд шүүх хуралдааныг шууд дамжуулсныг цахим хуудаст бичлэгийг байршуулсантай нэгэн адил үзэхээр зохицуулжээ.
Хуульд зааснаар хэргийг шийдвэрлэж байгаа шүүгч, шүүх бүрэлдэхүүн дараах тохиолдолд хэрэг хянан шийдвэрлэх ажиллагаа, шүүх хуралдааныг бүхэлд нь, эсхүл зарим хэсгийг хаалттай явуулахаар, эсхүл хэрэгт авагдсан нотлох баримтыг олон нийтэд мэдээлэхгүй талаар шийдвэр гаргаж болно.
Үүнд:
- Хэрэг хянан шийдвэрлэх ажиллагаанд насанд хүрээгүй гэрч, хохирогч оролцож байгаа бол шүүх өөрийн санаачилгаар;
- Нээлттэй ил тод байх нь хүний амь нас, эрүүл мэндэд ноцтой хохирол учруулж болзошгүй талаар хэргийн оролцогчийн гаргасан хүсэлт тайлбарыг шүүх үндэслэлтэй гэж үзсэн;
- Цаашид үргэлжлэх хэрэг хянан шийдвэрлэх ажиллагаанд ноцтой хохирол учруулах үндэслэлтэй гэж үзвэл;
- Хохирогч, гэрч, өсвөр насны яллагдагч, өсвөр насны шүүгдэгчийн эрх, хууль ёсны ашиг сонирхлыг хамгаалах зорилгоор улсын яллагч, хохирогч, гэрч, өсвөр насны яллагдагч, өсвөр насны шүүгдэгч, тэдгээрийн хууль ёсны төлөөлөгч, өмгөөлөгчийн хүсэлтийг харгалзан шүүхийн хэлэлцүүлэг, шүүхийн урьдчилсан хэлэлцүүлэг, шүүх хуралдааныг бүхэлд нь хаалттай явуулахаар заасан.
Төрийн нууцад хамаарах, хуульд тусгайлан заасан хэргийн эцэслэн шийдвэрлэсэн шүүх хуралдааны бичлэгийг шүүхийн шийдвэрээр байршуулна.
Дээрхээс бусад нээлттэй шүүх хуралдааны бичлэгийг шүүхийн шийдвэргүй байршуулах ба цахим хуудаст байршуулахыг хэргийн оролцогчдод хуульд заасны дагуу мэдэгдэнэ.
Доорх сайтаар нэвтэрч журамтай танилцана уу.
https://judcouncil.mn/site/decision_full/287
ДОРНОД АЙМАГ ДАХЬ ШҮҮХИЙН ТАМГЫН ГАЗАР