ФЭЙСБҮҮКТ ХУДАЛ ЗАР ОРУУЛЖ 183 ИРГЭНИЙГ ЗАЛИЛСАН ЭТГЭЭДЭД ХОРИХ ЯЛ ОНОГДУУЛАВ

2023-02-10    |   757

---

Шийдвэрийн дугаар: Дорнод аймаг дахь Сум дундын эрүүгийн хэргийн анхан шатны шүүхийн 2022.11.18-ны өдрийн № 355 шийдвэр

Шүүхийн шийдвэрийн тойм №2, 2023.02.07

Шийдвэрийн төлөв: Хүчин төгөлдөр

 

Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.”

 

Прокуророос иргэн Э-г “залилах” гэмт хэрэгт холбогдуулан яллах дүгнэлт үйлдэж гэм буруутай эсэхийг шийдвэрлүүлэхээр хэргийг шүүхэд шилжүүлжээ.

 

Иргэн Э нь facebook ашиглаж “бүх төрлийн тавилга түргэн шуурхай хийж, хөдөө орон нутагт унаанд тавьж өгнө” гэх худал зар тавьж, бусдын хийсэн төрөл бүрийн тавилганы зургийг уг хаягтаа байршуулан, захиалга өгөх гэсэн иргэдээс “урьдчилгаа” гэж мөнгө шилжүүлэн авч, нийт 183 иргэнийг залилж 49809.100  төгрөгний хохирол учруулсан байна.

           

Эрүүгийн хуульд зааснаар, зохиомол байдлыг зориудаар бий болгож, бодит байдлыг нуух замаар бусдыг төөрөгдөлд оруулж бусдын эд хөрөнгийг шунахай зорилгоор, хууль бус аргаар өөрийн болгосон үйлдлийг “залилах” гэмт хэрэг гэж үзэхээр заасан байдаг.

 

Шүүгдэгч Э-ийн үйлдэл нь уг гэмт хэргийн шинжийг хангасан, цахим хэрэгсэл ашиглан, залилах гэмт хэргийг байнга үйлдэж амьдралын эх үүсвэр болгосон буюу “залилах” гэмт хэрэг үйлдсэн гэм буруутай гэж шүүх дүгнэв.

 

Шүүхээс шүүгдэгч Э-г гэмт хэрэг үйлдсэн гэм буруугаа хүлээн зөвшөөрч бусдад учруулсан хохирлоос 6357.600 төгрөгийг төлж барагдуулсан зэргийг харгалзан түүнд 5 жилийн хорих ял оногдуулж, уг ялыг нээлттэй хорих байгууллагад эдлүүлэхээр шийдвэрлэв.

 

Шүүхийн шийдвэрийг бүтнээр харах цахим холбоос:

https://shuukh.mn/single case/66802?daterange=2022-01-01%20%-202022-10...

 

Тоймыг бэлтгэсэн: Дорнод аймаг дахь Сум дундын эрүүгийн хэргийн анхан шатны шүүхийн шүүгч Г.Намуунтуяа