НИЙТЭД ТУСТАЙ АЖИЛ ХИЙЛГЭХ ЯЛЫГ БИЕЛҮҮЛЭЭГҮЙ ТОХИОЛДОЛД ХОРИХ ЯЛААР СОЛИНО

2023-02-02    |   721

---

Дорнод аймаг дахь Сум дундын эрүүгийн хэргийн анхан шатны шүүх 2023.01.23 № 336А шийтгэх тогтоол

Шийдвэрийн төлөв: Хүчин төгөлдөр болоогүй

Процессын тойм: 01, 2023.02.01

Санамж: "Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.”

Шүүхийн шийтгэх тогтоолоор Д-г бусдын эд хөрөнгийг хулгайлах гэмт хэрэг үйлдсэн гэм буруутайд тооцож, 500 цагийн хугацаагаар нийтэд тустай ажил хийлгэх ял оногдуулж, ялыг өдөрт наймаас дээшгүй цагаар хийлгэхээр тогтоож шийдвэрлэсэн байна.

Гэтэл ялтан Д нь хүндэтгэн үзэх шалтгаангүйгээр нийтэд тустай ажил хийлгэх ялыг хийж гүйцэтгээгүй, ял эдлэхээс санаатай зайлсхийсэн учраас түүний эдлээгүй үлдсэн нийтэд тустай ажил хийлгэх ялыг хорих ялаар солих тухай дүгнэлтийг прокуророос шүүхэд ирүүлжээ.

Хуульд зааснаар нийтэд тустай ажил хийлгэх гэж нийтийн ашиг сонирхолд тустай ажлыг цалин хөлс олгохгүйгээр хийлгэхийг ойлгох бөгөөд ялтан нь хуурамчаар өвдсөн, эмнэлгийн магадлагаа, зохих баримтыг хуурамчаар бүрдүүлсэн, бие эрхтэн, эрүүл мэнддээ санаатайгаар гэмтэл учруулсан, чөлөөний баримт, материалыг хуурамчаар бүрдүүлсэн, зөрчил гаргаж шийтгүүлсэн, ажил хийлгэж байгаа байгууллагын дотоод журмыг зөрчсөн, ял эдлүүлэх нийт хугацаанд ажлаа дур мэдэн орхисон, хүндэтгэн үзэх шалтгаангүйгээр ажил тасалсан, архи, согтууруулах ундаа хэрэглэсэн үедээ ажилд ирсэн, ажил олгогчоос тавьсан хууль ёсны шаардлагыг удаа дараа биелүүлээгүй зэрэг зөрчил гаргасан тохиолдолд нийтэд тустай ажил хийлгэх ялыг хорих ялаар солих үндэслэл болно.

Шүүх ялтан Д-г ажил олгогч байгууллагаас хүлээлгэсэн үүргийг зөрчиж, хүндэтгэн үзэх шалтгаангүйгээр ажил тасалж ялыг эдлэхээс зайлсхийсэн зөрчил гаргасан гэж дүгнэн түүнд шүүхээс оногдуулсан 500 цагийн нийтэд тустай ажил хийлгэх ялаас биелүүлээгүй үлдсэн 396 цагийн нийтэд тустай ажил хийлгэх ялын найман цагийн ажлыг нэг хоногоор тооцож 49 хоногийн хугацаагаар хорих ялаар сольж, хорих ялыг нээлттэй хорих байгууллагад эдүүлэхээр шийдвэрлэв.

 

Шүүхийн шийдвэрийг бүтнээр харах цахим холбоос:

 

Тойм бэлтгэсэн: Дорнод аймаг дахь Сум дундын эрүүгийн хэргийн анхан шатны шүүхийн шүүгч П.Пагма